فى حياة المطرب الشعبى المحبوب سعد الصغير عشرات القصص التى لا يعرفها أحد ، قصص تحمل الكثير من الملامح الإنسانية ،مثل موال طويل ملئ بالمتاعب والآهات والمسرات ، أيام الكفاح المرة التى أدت إلى أيام النجومية  ، أجمل ما فى سعد الصغير رفضه أن ينسى أفضال أهله وناسه عليه،ابسط دليل انه مصرعلى العيش فى المنشية-الوحدة العربية-بشبرالخيمة، مازال يشم رائحة ايام زمان فى الصباح والمساء مع انه يستطيع ان ينتقل الى ارقى الاحياء مثل النجوم الآخرين ، سعد يحتفل بالماضى الذى يشكل الحاضر فمثلا عم مصطفى بتاع البوتاجازات وعم خلف ابواحمد بياع الشرائط وطارق عبدالله اول منتج له واحمدعبدالله والسبكى ومعتمد جمال ومصطفى كامل واحمدعادل وملاك عادل ومحمدعبدالمنعم وآخرون كثيرون..وفوق كل هؤلاء زوجته ووالدته اللتان كان لهما فضل كبير على سعد حتى الآن.

 

من اجل ذلك قررسعد ان يغنى (الناس دى ليها فضل عليا) ويصورها ..لكى يخلد حياته معهم ويحفر افضالهم على جدار الزمن بروح ابن البلد الاصيل الذى لاتغيره الايام فى سابقة تاريخية تعد هى الاولى من نوعها فى زمن قلما نجد فيه من يصون الجميل لأصحابه. فى البداية تحدث سعدالصغيرقائلا: أغنية (الناس دى ليها فضل عليا) تدور قصتها حول كل واحد له فضل علىّ فيما وصلت اليه حاليا بفضل الله من نجاح وشهرة وعيشة كريمة لذا فكرنا فى عمل اغنية بهذا المعنى  ، ويضيف سعد: عم مصطفى على سبيل المثال كنت شغال عنده فى تصليح وبيع البوتاجازات، ولولاه ما كنت تعلمت الاعتماد على نفسى فى سن صغيرة ومعرفة قيمة العمل والمال والجهد والعرق ..واذكر وقت ما اشتغلت معه كان عمرى 14 عاما وكان يعطينى 15قرشا فى الاسبوع وكنت احيانا احصل على شلن بقشيش!..وامى لها الفضل الكبير علىّ بعدالله سبحانه وتعالى،كما ان اى احد عمل معايا حاجة كويسة يبقى له فضل عليّ..

والمنتج طارق عبدالله له فضل علىّ وهو اللى عرف الناس بسعد الصغيروعتبة الخير بالنسبة لى.. فكنت اعمل مع واحد اسمه  عم خلف ابواحمد -بياع كاسيت- اللى عملت معه اول شريط (عاشور..عاشور) اللى اتغنت فى فيلم الناظر لعلاء ولى الدين -الله يرحمه-وعم خلف كان فى رمضان اسبوعيا يعطينى عشرة جنيهات لأننى كنت متجوز ساعتها ومش معايا فلوس!..وكان يشاركه المنتج عصام فتحى اللى باع مصاغ مراته حتى يحجز لى استديو فى احد الايام!..وبالتالى لما ربنا كرمنى وكبرت مش قادر انسى لهم مواقفهم الجميلة معايا وعاوز اعمل لهم حاجة وارد لهم الجميل ..فكنت اجلس معهم فى ميدان المؤسسة لأنهم بيبعوا شرائط كاسيت هناك..

ويواصل سعد حديثه قائلا:- عملت سائق تاكسى وفشلت وراحت علىّ فلوسه انا و زميل لى كان يشاركنى فيه..!..للعلم نفسى حياة زمان ترجع بالشكل اللى انا عليه الآن وعشان كده بأعمل الاغنية دى، كنت قديما آكل فى الشارع ولا يهمنى اما الان فتجد من يقول بص النجم بيعمل ايه وغصب عنى بأعمل كده لأنى واخد على كده ..علي الحياة البسيطة بدون تعقيد ..فأنا زى ما انا لم ولن اتغير، ويستطرد سعد قائلا: عاوز اقولك انى تعبت ..ما وصلتش للى انا فيه بفضل الله بسهولة وشقيت .. سبق لى العمل فى مغلق للاخشاب لتصنيع كرتونة التفاح، وصبى لعامل محارة ونجار مسلح وطبال وكورال وراء المطرب ومطرب نمرة ب15جنيه .. ثم توالت اعمالى الناجحة بعد ذلك وبدأت الناس تعرف سعد الصغير و كان نجاحى وقتها بنسبة40% والفضل يعود لله ثم لأحمد عبدالله واحمد السبكى اللى وصلوها لــ 100%.. كما ان المذيع احمد عبدون احد اللذين وقفوا بجانبى فى حكاية المسجد اللى قمت ببنائه بفضل الله وكان عامل مهم واساسى وفعال ..

 ربنا يكرمه هو والدكتورة سعاد صالح الحقيقة.. ويقول سعد: انا عملت كده احتراما واجلالا لهم وعشان لا انسى نفسى، كما انى عاوز اقول للناس كلها فلان وفلان لهم فضل عليا ..

امثال مهندسا الصوت احمد جودة وياسر حسين والشاعر مصطفى كامل والموزع احمد عادل والملحن محمد عبدالمنعم والشاعر ملاك عادل والمخرج ياسر سامى والمذيع المتميز المحترم ممدوح موسى وحماي وحماتى وزوجتى ووالدتى وشقيقى محمدالله يرحمه ووالدى رحمة الله عليه اللى كان نفسى ينعم فى خير ابنه زى ما ياما نعمت فى خيره، وكابتن معتمد جمال وعاطف جاكسون الطبال هشام عباس وعادل مهنى اكبر موزع كاسيت فى مصر وعلى عبدالقادر اول واحد لبسنى بدلة فى حياتى وكان لونها اخضروغيرهم كثيرون.. ويختتم سعد حديثه قائلا: اقول للناس متستكتروش علياللى انا فيه والفلوس لا تفرق معايا خالص وعشان كده نفسى ومنى عينى اعمل مشاريع كثيرة للناس الغلابة لأنى تعبت فى حياتى وعشان كده عاوز افرح بالناس اللى وقفوا بجانبى.